頂改捌講著客語的「日頭花」佮台語的「日頭花」，仝形煞無仝意的這種情形，號做「假朋友」（false friend）。今仔想欲對字形前進到「詞意」部分，來紹介兩種對應關係：「離散」佮「聚合」。 我進前咧準備客語檢定的時陣，佇詞彙彼本注意著這兩句例句： 客（四縣）1️⃣： 頭擺人燒 [樵] 煮飯。 客（四縣）2️⃣： 這凳仔係 [樹仔] 做个。 若翻做台語，會是下跤這兩句： 台1️⃣： 古早人燃 [柴] 煮飯。 台2️⃣： 這椅仔是 [柴] 做的。 逐家會使發現著：台語毋管是提來燃抑是提來做物件，攏號做「柴」。毋過客語提來燃的叫做「樵ceuˇ」，當做材料、提來做物件的叫做「樹仔su eˋ」。這種台語一个詞、客語變幾若个詞的狀況，對台語母語者的觀點來看，是一種「離散」（split）： T < H₁, H₂, … 對客語母語者的觀點來看，拄好倒反，是一種「聚合」（convalescence）： H₁, H₂, … > T 遮我用H代表客語詞，T代表台語詞，倒爿往正爿是學習的對應方向，>抑是<開喙較大的彼爿代表有較濟相對應的詞。 （1/6）