呢幾晚我訓得唔係幾好，腦入面總係浮現好多片段，一啲斷斷續續嘅回憶，好似一場無法停下嘅夢。一啲開心嘅，一啲唔開心嘅，但大部分都係關於嫲嫲。嗰啲回憶，好似一片霧，籠罩住我，令我心裏有種沉重嘅感覺。 其實我好少同人講自己嘅家庭，因為細個嘅我就已經係冇父母陪住嘅孩子。點解冇父母？我細個嘅時候問過自己無數次，但呢個問題好似一條永遠解唔開嘅鎖鏈，越諗越緊，越緊越痛。 我索性放棄去問，因為我發現，就算問得再多，答案都只會係一片空白，空到令人窒息。 我同其他人仲有一樣唔同，我係聾人。呢種孤單，喺我細個嘅時候更加深刻。其他小朋友可以聽到爸爸媽媽嘅聲音，可以聽到笑聲、音樂，甚至係呢個世界嘅喧鬧，但我嘅世界係靜止嘅，一片無聲。好多時候，我只能靠睇人嘅嘴形去理解對方講緊乜。呢種隔膜，令我同世界嘅距離永遠都好遙遠。 我人生入面最大嘅幸運，係有嫲嫲喺我身邊。佢唔識手語，但佢用咗好多方法去陪我溝通，去教我，去俾我愛。佢成日會攞住紙同筆，寫低想同我講嘅嘢；甚至有時候，佢會用好簡單嘅動作，想表達佢嘅意思。佢嘅耐性，係我一生都無法忘記。佢用佢嘅方式，將愛傳達俾我，令我覺得，自己冇聲音嘅世界，唔係完全黑暗嘅。 續