近日讀《漢書．王莽傳》。王莽為左獨攬大權，由新都侯、大司馬、安漢公，一直做到宰衡，位極人臣，但係仲未滿足。仲想做埋假皇帝，為做真皇帝鋪路。 王莽係儒生，為左論證假皇帝喺歷史上真係存在過，佢必需要喺文獻入面搵到證據。一眾大臣好識趣，喺而家失傳既《尚書・嘉禾》搵到文獻根據。〈嘉禾〉係咁講：「假王蒞政，勤和天下。」呢兩句係周公行「登基」之禮時，司儀講既說話。呢度既「假王」，即係攝政王、臨時皇帝。 不過後世認為王莽係亂臣賊子，連帶〈嘉禾〉既逸文都懷疑。清代學者宋翔鳳喺《過庭錄》引用莊述祖既講法，認為「假」係「格」既通假字。如果佢咁解係啱，「假王」就唔係臨時皇帝，而係「勸告王上」咁解，但係咁解未必啱。 「假王」解做臨時皇帝，喺先秦文獻都可以搵到證據： 昔者武王崩，成王少，周公旦踐東宮，履乘石，祀明堂，假爲天子七年。（《藝文類聚》六引《尸子》） 周公旦假爲天子七年，成王壯，授之以政，非爲天下計也，爲其職也。（《韓非子‧難二》） (續)