睇完人哋分享啊媽有幾癲，搞到我都想分享下：我啊媽好鍾意一發癲就攞把菜刀/磓仔岀嚟，話要斬我🔪 上個post有講到，我係單親家庭大，跟啊媽住。而我啊媽係有精神病，定期要去精神科覆診，我由細到大都理解唔到：點解當年法庭要判我跟啊媽，搞到我有個child abuse 嘅童年陰影呢？！ 由細到大，啊媽打我係常態，佢心情起伏好大，心情好就對我好，心情唔好時 當我做錯少少嘢，佢就會打我（星我一巴、用衣架打、一拳打埋嚟）。仲記得我小五定小六，唔記得做錯乜嘢，佢一拳打落我副眼鏡到，打到我個眼鏡框斷咗，我驚到躲咗入房嘅被入面，佢仲繼續一拳拳咁打我。第二日我哋去婆婆到食飯，我話俾婆婆聽，婆婆講嘅說話我仲記得，佢同我媽講：你依家蝦佢細路仔無能力反抗咋嘛！你睇吓佢大個咗會點？！ 除咗打我，佢有時發癲試過攞把斬骨嗰啲菜刀岀嚟嚇我，話要斬死我。又試過攞揼釘嘅大鐵磓岀嚟，話要打爆我個頭。當時我讀緊小學，唔識反抗，會喊住咁求佢，叫佢唔好打。可能佢見我個樣驚，滿足到佢變態嘅心理，所以就成日用呢招。 去到我中一定中二，當年好hit金秀賢套來自星星的你。我媽話想睇，叫我用電腦播俾佢睇（佢唔識用電腦）。留言續⋯