聽個地產AA朋友講， 淡季嘅時候， 佢地會蛇上去一d鎖匙盤單位到打麻雀， 呢d單位已經交吉，無人晌入面住， 業主將鎖匙交畀物業代理，等佢地搞放盤。 呢d單位好多時咩傢私都無，清空晒。 但係，以下呢個位於太子區嘅單位， 就咁好有張麻雀枱晌到，岩晒一眾師兄。 如是者，湊夠腳，就開枱啦。 個單位幾舒服，陽光充足，無西斜， 真係拎副牌上去就玩得。 有日，兩男兩女上去， 其中一個叫Rachael嘅， 嗰日唔知搞乜，贏到開巷，全日都摸靚牌， 又十三么又大四喜，佢就當然開心啦， 返工時間有錢搵之餘仲可以賺埋外快。 到差唔多五點左右，諗住打埋呢圈就收工喇， 點知本來開心歡暢嘅Rachael聲都唔聲， 面都灰晒，滿頭大汗。 「乜好熱咩？駛唔駛幫你開大隻窗？」有個問。 「呃…唔…唔駛…」Rachael支支吾吾咁答， 大家都唔知佢搞邊科。 突然！ Rachael企晌身，拎起個手袋，成身震晒咁話： 「走喇…我唔打喇…走喇走喇…」 其他三個agent未黎得切反應， 就已經見Rachael 轉身衝咗出屋出面。 「嘩！咩料呀！？」 「割禾青呀？」 三個晌麻雀枱到議論紛紛。