Kolor演唱會取消😢 記得上年大約呢個時候，係九展Touchdown演唱會，Sammy話Touchdown係開始。佢地會去巡迴，尾站會返黎香港，係一個大啲嘅場見大家！呢個承諾，大家都好期待。 後來聽到係會展開，即刻買飛。然後一直期待12月可以見到Kolor，一齊唱一齊跳一齊喊，放低一啲壓力，出左會場繼續努力生活。 今日，見到個show要取消嘅通知。原因係不可抗力...第一下真係好灰，嗰種灰係覺得「係，我一路都知留得低係空間越黎越細，但個空間已經越黎越壓迫，迫到連一絲呼吸嘅罅隙都要攞走...」 對我黎講，Kolor嘅歌一直係救生繩。每一次佢地嘅歌都可以比到力量我再堅持多陣，每一次佢地嘅歌都係比左個出口我釋放眼淚，每一次佢地嘅嘅歌都可以牽起一啲我自己都唔察覺嘅情緒，每一次佢地嘅Show都係我一份期待... 我頭先睇左一個舊訪問，原來鍾意嘅Kolor嘅大家都有咁嘅同感。雖然好似邪教咁樣（笑），但我要講佢地嘅歌同生活態度真係救左好多香港人。（至少我係其中一個，因為佢地而堅持落去，而開始學跑步。） 續...