睇完《破地獄》先唔講套戲拍得好唔好，啲劇情鋪排點點點。 我只係想講作為屋企嘅妹妹，一個女兒，我係哭到不能。 我同呀哥永遠都可以一句說話就扯火嗌交，場交嘅最後一定用一句「關你咩事？」收尾。永遠我都好想答「其實唔關我事，真係唔關我事」但因為你係我呀哥，所以你所有事都關我事，你有咩事，都有我呢個呀妹係隔離。 面對父親呢part，應該係我喊得最厲害嘅位。或者因為家父就係呢種父親。永遠唔會講自己嬲咩，永遠拍完枱就行入房生悶氣（點解我會遺傳曬呢啲嘢）。但當我喊我唔開心要人幫又唔出聲嘅時候，佢永遠都係你隔離。 或者我喊，都只係期望有一日係佢口中聽到，「我愛你」「我為你驕傲」而唔係透過一張紙一封信話我知，爸爸係愛你。但我知你係唔識表達情感嘅爸爸，所以就心照啦！ 呢一兩年先後係大酒店送走咗婆婆同嫲嫲，所有係靈堂嘅畫面都歷歷在目，好似從頭送多一次佢哋走咁。兩次我都好叻冇喊，因為我知道我一喊，佢哋可能就唔捨得走，邊個係最錫嘅孫仔我唔知，但我一定係佢哋最錫嘅孫女。