前排係app識左個男仔，覺得好熟面口，傾傾下發現大家以前曾經同一間gym操過，我見幾有緣，又合眼緣，咁傾多兩日就約食飯。佢講明只係想玩下，唔想拍拖，我覺得岩傾、岩feel、互相尊重，又唔係呃感情，係無問題。 第一次見，佢幾好禮貌，正常咁傾偈，無亂講野又無亂掂我，當時對佢幾有好感。最後佢埋單，我俾返錢佢，佢收哂同埋無找錢俾我，我即刻覺得佢對我無興趣，因為以我經驗，有興趣再見面都會請我，然後話下餐我請，所以果時諗住都唔會再見。 點知，分開各自搭車之後，佢好快就msg我：「唔知之後有無機會用你fun下呢？」見到呢句，我即刻覺得反感，咩叫做「用我」？當我物件呀？同埋，乜原來對我有興趣？咁點解無請我食飯之餘仲要我俾大份啲錢？不過，無規定男人一定要請食飯，或者佢都係觀察下我係咪呃飯食，加上第一次見面對佢感覺真係唔錯，所以我決定再觀察下，我答佢：「我會考慮下」。 （留言續）