Discussion 29 【Undertrained vs overtrained】 Undertrained指訓練不足，Overtrained就即係過度訓練。 前者指訓練負荷偏低，導致身體得唔到足夠嘅刺激去成長。而後者就係指訓練負荷過高，身體無法承受從而出現不良反應（例如受傷、生病、厭跑） 如果要從兩者之間選擇，我必然會選擇前者。因為練唔夠，最多係進步得慢，但終究係前進緊。但練過龍，就被迫停低，然後不進則退。 要記住 一課120分+ 一課傷咗練唔到0分， 都唔及兩課中規中矩嘅70分加埋嘅140分 訓練就係風險同回報嘅評估，承受越大風險，確實有更大嘅潛在回報。搏盡啲唔緊要，但要問自己輸唔輸得起。 教練嘅工作之一，就係用一個相對宏觀嘅視野補充運動員嘅盲點，共同合作，評估好訓練嘅風險同回報，盡量將訓練安排喺共同討論得出嘅理想位置（未必中間就係好，有人會希望危險但進步得快啲、都有人會希望安全但進步得慢啲，教練同運動員應該協調出共識）