【有關毒狗】 凌晨三點，氣溫13度。 「阿公，好凍...搞掂未。」冷冽晚風呼嘯拂面，我拉緊外套頸領，牙關打顫。 「狗嘅靈魂能量比較弱，超渡要耐少少。」阿公。 事源，一位朋友向阿公求助，佢養咗好多年嘅狗狗，散步時誤吸有毒粉末，發現異樣即時送院，可惜獸醫話毒性太強，無咩可以做到，第二日，兩隻狗狗都撐唔住去咗彩虹橋。 望住空蕩蕩嘅屋企，牆紙嘅爪痕，被咬爛一角嘅梳化，兩隻狗狗留低好多回憶，主人知道狗狗最後嗰段時間好痛苦，希望去到彩虹橋可以開心，至少投胎順利。 阿公去朋友屋企幫狗狗完成超渡之後，話附近後山仲有好多走失嘅魂魄未投到胎，所以決定上山召魂。 近日香港各區都有毒狗案，有主人嘅狗狗可能會上新聞，但我哋知道嘅背後受害狗狗一定更多，有好多流浪狗誤食毒餌，受盡痛苦去世。 過咗幾個鐘頭，我隱約聽到遠處斷斷續續傳出狗吠聲。 阿公開始唸咒，又燒符引導狗狗投胎。 不知不覺，天空已經冒出早晨藍光。 阿公唸咒聲歇止，似乎儀式已經完成。 正當阿公收拾法器，有不少晨運人士經過，阿公突然又開始唸唸有詞。 「早日脫離苦難，順利投胎，你哋受嘅苦，個天會睇到。」阿公。 (1/3)