依家渣馬已成為香港每年運動盛事，參賽者愈來愈多，自然就更多人報導同提及 廿年前我跑過一次。當年同朋友們食飯傾跑步話題時，心血來潮，話不如一齊報名玩下。記得有人話10K太易無挑戰性，半馬只得西隧無青馬汀九，一係吾玩，一玩就要玩最長嘅，最後報哂全馬，挑戰下自己，最多咪提早被截龍上巴士呷蕉，最重要係有得上青馬大橋，踩下條路，都咪話吾爽 就係咁成就咗我第一次全馬，亦都係暫時唯一一次。好幸運亦好神奇，我最後係喺無乜練習下跑足全程，當然之後因為膝頭劇痛去睇急症而令自己個幾月都未復元呢啲咁丟臉瘀皮嘅事我就吾詳細再講了 以前未有智能手機，所以冇得喺青馬西隧打咭，只能用記憶記住當時嘅難忘畫面：跑至青馬時嘅突然狂風驟雨，全身盡濕；長青隧道內嘅溫暖令自己回復體力，幾乎見人就過；西隧前已無氣無力，仲要經過一條像永無止境又焗又翳悶嘅西隧；眼見隧道旁多位跑手或休息或抽筋或已想放棄嘅樣子，自己則靠意志力繼續捱落去；由奧運至西隧出口嘅整個路段竟然連一個水站都冇，又冇嘢食，跑上干諾道西天橋，饑餓到哀求迎面而嚟嘅幾個工作人員俾嘢我食，最後成功乞求到梨同三文治，個梨絕對係我人生食過咁多個梨當中最好食最甜同最多汁嘅！