我一直覺得，藝術呢樣嘢——無論係電影、漫畫、畫作，定係歌曲——其實好主觀。你覺得一套戲好定唔好睇，好大可能都係因為佢啱唔啱你嘅口味。如果你鍾意睇打鬥片，可能你會覺得《John Wick》好正，但如果睇《Dune》，你可能會嫌佢節奏太慢，打鬥場面唔多。呢啲感受係真實嘅，亦無分對錯，因為每個人嘅欣賞角度都唔同。所以，我哋應該尊重各種聲音同埋意見，畢竟藝術嘅本質就係主觀。 當然，如果你話要全面評價一套戲好唔好，你可以從一啲比較中立嘅角度入手，例如場景調度、美術設計、音樂、拍攝手法、劇本同演員演技等等。但即使如此，評論始終都會帶有個人情感嘅痕跡，因為藝術本來就係一種同觀眾對話嘅媒介。所以，發表個人評論，真係無話啱定錯，尤其係講藝術呢樣嘢。 不過，我覺得最重要嘅係，你要評論一套戲好唔好，第一步係咩？就係入場親身感受。未睇就批評，對創作者同觀眾嚟講都唔公平。至於有啲人話影評人一句「唔好睇」就會影響票房，其實我相信觀眾係有批判性思考嘅，唔會咁容易畀一句「唔好睇」牽著走。(下文繼續)