〈渣打馬拉松配速策略〉 無論參加任何距離嘅比賽，我哋都應該優先追求「目標體感」而唔係「目標配速」 就算每公里都符合「目標配速」但體感比預期吃力，去到某個位身心都吃不消，即係俗稱嘅「跑爆咗」然後不得不減速，之後賺嘅時間都會獲利回吐、全部還返出去。 所謂「目標體感」應該係點？我會話係累進式嘅疲勞，即係唔會一開始就好辛苦，但會隨住跑嘅時間同體力消耗，而逐步提升辛苦嘅感覺。我建議大家可以將比賽嘅體感分成三段： 第一段：保持身心放鬆 比賽初段時，切忌被興奮嘅心情同熾熱嘅氣氛沖昏頭腦，可以採用「慢跑式起步」想像自己只係慢跑，中和心情同氣氛，大致上就會係自己預期嘅配速。起步後優先感受身體狀態、尋找節奏，先令自己跑得順，同時提醒自己要保持身心放鬆地跑，避免喺比賽初段大量消耗體力。 第二段：集中精神、保持專注 比賽嚟到中段，初段無論點樣盡力保持身心放鬆，體力都會有一定消耗，呢啲時候要提醒自己保持專注，用多少少精神維持配速，對自己甚至對手嘅狀態敏感，適時調節配速。稍微鬆懈，好可能就會跌速，或被集團加速放甩。理想係可以喺呢個階段進入「心流」狀態，全神貫注地跑，動作控制自如、時間感變快！ 留言待續