救貓記(1) 趁仲有記憶記錄返😆 • 2025年1月22號，準備收工既時候老公打比我：你估下我搵到啲咩？當下冇理到佢講咩，只係聽到電話另一邊傳黎貓叫得好淒厲既聲。即刻問佢：做咩蚊蚊(本身養緊既黑貓)叫得咁慘😿？ 點知佢同我講岩岩停好車就見到有一隻好細既貓B走左落佢車底，不停係度叫。 唔知係咪同貓媽走失左加上想避雨，所以落左停車場。個停車場其實好大，出入口得2個，一頭一尾。其他都有防煙門。估計佢搵唔到出口，盲舂舂周圍行。我即刻叫佢上樓拎啲物資睇下捉唔捉到佢。其實都擔心落返黎會唔見左佢🥺 落到去真係搵唔返佢，後尾有個洗車姨姨講返隻貓B去左另一架車底。 返到樓下我冇上樓直奔去停車場。原本係行去平時車位既位置，行到咁上下已經聽到貓叫，真係叫得好大聲，大聲到我覺得大半個停車場都聽到😂最後我係靠啲叫聲搵到佢地既位置。 佢一直係車底唔敢行出黎，但如果用食物引佢，佢係會出黎食。不過當你行近既時候佢又會後退返。當下諗既然佢咁餓，不如試下整條肉泥路🤣慢慢一步步引佢行出啲。點知佢又真係上當。但佢食哂又會即刻跑返去車底。 (留言續)