Discussion 30 【重視 vs 執著】 我成日強調「成績並唔係一切」「唔好用成績定義自己」「進步或變強有好多面向，成績只係其中一種」 原因係唔希望大家將跑步嘅成績，視為跑步嘅唯一動機、成就感、乃至快樂來源。都唔想大家只用成績去同人比較，忽略成績背後，各人嘅故事、投入嘅時間心力同個體嘅差異包括天份。 成績亦會隨住種種因素數變化，例如外在環境同自身狀態。剩係夏天已經好難跑到「好時間」但唔代表夏天所有嘅訓練同比賽都係無用功同毫無收穫。 我覺得成績絕對重要，如果投入好多努力，但成績毫無變化甚至退步，好大機會係方法有誤，係教練嘅責任。我都希望大家追求進步、突破自己，而成績往往能夠呈現訓練嘅進度。 但係「重視」成績唔代表「執著」成績 前者係認同成績重要，會努力追趕，但同時接受成績有高有低，會理性地分析成績上落嘅原因，並會因此調整訓練同心態。 但後者係眼中只有成績，只有好成績同PB先有意思；跑唔到好成績，練習就係白費心機、自己就係一文不值。 過份執著往往會迫自己進入一個死胡同，反而會窒礙自己成長，亦會忽略沿途嘅得著。成績固然重要，但希望大家過程要執著，而結果要隨緣。