《看我今天怎麼說 》帶嚟好多思考。 特別之處，在於寫實咁喺音效同劇情上，畀人親自體會聾人嘅處境同世界，同時又包羅咗好多種唔同嘅視角。差異有啲好大，極端相對，有啲好細微。求同存異，都努力希望搵到能自在心安之所。 對角色冇絕對嘅批判，衝突嚟自立場差異、能否同理、現實限制。有不得不獨自面對單打獨鬥，有互相支持嘅溫暖，亦有因為其他人先會產生嘅壓力同焦慮。不同家庭相處模式，不同取向同態度，包圍佢哋嘅世界，都對自我價值同身份認同帶嚟影響。 個性、處境同選擇不同嘅人，可能只係用咗自己嘅角度去諗，去為對方着想，為件事着想，有意無意想對方成為自己嘅同類，以為咁就係最好。乜嘢係幸福、點樣係好、點樣係正常、點樣係唔正常，點樣係我，由邊個定義？ 無論聾人用口語抑或用手語，兩邊都會有一啲情況同挫折要面對，會影響到交友圈，點樣做事，點樣睇世界、睇彼此、睇自己，點樣面對同自己唔同嘅人事物同新觀點，點樣接觸同克服新事物。 游走於聽人同聾人之中，兩種溝通方式都有用，同樣係介乎兩者之間嘅人，亦都有對比，想法唔一樣。有諗法漸變嘅人，亦有始終如一嘅人，角色掙扎過程都有呈現出嚟，各自嘅選擇都合情合理。 cont'd