戲裡Alan已工作咗一段時間，同fresh grad初出社會嘅素恩唔同，似乎係聾人角色中最社會化嗰個，渴望嘅身份認同亦都偏向聽人，可能因為佢嘅職業，較常需要聆聽客戶需求同妥協，慣於刻意表現出友善圓滑易相處，傾向討好別人。 聾人優勢嘅觀察入微，令佢喺察言觀色上如魚得水，工作上得到滿足感。另一方面，依靠人工耳蝸，有聲嘅世界逐漸變成咗佢嘅一個comfort zone，因而比另外兩位主角更加安於現狀。有時甚至為咗迎合聽人客戶嘅期望而不惜overwrite咗聾人嘅表達權利，以一個我幫緊你哋中間協調、fix返嘅心態。 佢有佢嘅強勢，但同時又會判斷幾時要妥協，幾時放棄爭辯，程度啱啱好唔易，而Marco拿捏得幾好，跟隨素恩慢慢對Alan認識更深，會因為想法唔同而漸行漸遠，但唔會覺得Alan個性唔一致。 當人工耳蝸原來唔係一勞永逸，會有期限，而有未必成功嘅風險時，都暗暗為Alan嘅未來埋下咗隱憂。