耐咗無寫食評，唯有貼翻舊文回味吓自己嘅味覺，然後獻醜。 . 逸東軒 午市點心 . 有日心血來潮打電話去逸東軒預約食平日嘅午市，估唔到第二日就有位，於是就去食逸東軒喇。咁佢同平時飲夜茶或者普通嘅點心鋪，喺收費、用料同師傅手工上都會係另一個層次，所以都會認真d試佢嘅手勢。今次就試左蝦餃、燒賣、小籠包三款點心，外加逸東軒出名嘅叉燒，此外，唔少朋友都介紹佢地嘅冷盤「話梅車厘茄」，大家都可以試吓。 . 「明爐蜜汁叉燒」，$238 . 叉燒採用左半肥瘦嘅部位，肉質嫩滑鬆軟，油花分布平均。食得出師傅喺烤製之前，已經花咗唔少心機將條肉打鬆。相比喺坊間用鬆肉粉去破壞舊肉嘅纖維，成舊叉燒放入口果陣，係緊緻得嚟鬆軟帶筋。佢亦唔會煮得過老，或者放得太耐吹到乾晒，令到食叉燒果陣一條條絲痴牙。 . 至於醃製方面，當然逸東軒會準備自家嘅醃料秘方，但對比起大家喺街市買嘅叉燒。舊叉燒食入口果陣似乎醃得未夠入味。一嚟帶唔到舊豬肉提升香味；二嚟食到成片叉燒嘅邊邊位仲帶緊陣豬味。不過，又由於個醬汁係自家調味，唔學似外面做法咁瘋狂掃麥芽糖落舊醃得太鹹嘅叉燒，逸東軒成件叉燒喺口感上又相對平和均衡好多。(1 / 3)